சத்தீஸ்கரில் நாளை நடைபெறவிருக்கும் தேர்தல் அமைதியான முறையில் நடைபெறுவதற்காக 1 லட்சம் பாதுகாப்பு படை வீரர்கள் குவிக்கப்பட்டுள்ளனர் என்று மூத்த காவல் அதிகாரி கூறினார். முதல் கட்ட வாக்குப்பதிவு அமைதியான முறையில் நடைபெற துணை ராணுவ வீரர்களும் பாதுகாப்பு பணியில் ஈடுபட்டுள்ளதாக சிறப்பு அதிகாரி டிஎம். அவஸ்தி பிடிஐ-யிடம் தெரிவித்தார்.
மேலும், கடந்த பத்து நாட்களில் பாஸ்டர் மற்றும் ராஜ்நந்தகன் மாவட்டங்களில் 300 வெடிகுண்டுகளை கண்டெடுத்துள்ளதாக அவர் கூறினார்.
தேர்தலை சீர்குலைக்க மாவோயிஸ்ட்டுகள் எடுக்கும் அனைத்து முயற்சிகளும் தடைசெய்யப்பட்டு வருவதாக தெரிவித்தார். துணை ராணுவமான சிபிஆர்எஃப், பிஎஸ்எஃப், ஐடிபிபி- வீரர்கள் மற்றும் பிற மாநிலங்களிலிருந்து 65,000 காவல் படை வீரர்களை மத்திய அரசு தேர்தல் வாக்குபதிவு நடைபெறும் இடங்களுக்கு அனுப்பி வைத்துள்ளதாக கூறினார்.
இந்திய விமானப் படை மற்றும் பிசிஎஃப்-ன் ஹெலிகாப்டர்கள் பாதுகாப்பு பணிகளில் ஈடுபடுத்தப்பட்டுள்ளன. தற்போது தங்களுக்கு இருக்கும் சவால், வாக்குபதிவு மையங்களில் பணிபுரியும் அதிகாரிகளுக்கு உரிய பாதுகாப்பு அளிப்பதாகும் என்று கூறியுள்ளார்.