மேற்கு வங்கத்தில் ஏற்பட்ட விபத்தில் சிக்கி பாஜக வேட்பாளர் சாந்தனு தாகூர் படுகாயம் அடைந்துள்ளார். அவருக்கு மருத்துவமனையில் தீவிர சிகிச்சை அளிக்கப்பட்டு வருகிறது.
மேற்கு வங்கத்தில் பாங்கோன் மக்களவை தொகுதியின் பாஜக வேட்பாளர் சாந்தனு தாகூர். இவர் தனது ஆதரவாளர்களுடன் காரில் சென்று கொண்டிருந்தபோது கைகட்டா என்ற இடத்திற்கு அருகே இன்னொரு கார் மோதியது.
இதில் பாஜக வேட்பாளர் வந்த கார் பலத்த சேதம் அடைந்ததுடன், சாந்தனுவுக்கும் காயம் ஏற்பட்டது. இதையடுத்து அவர் உடனடியாக மருத்துவமனையில் அனுமதிக்கப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது.
பாஜக வேட்பாளரின் ஆதரவாளர்கள் 2 பேருக்கு காயம் ஏற்பட்டிருக்கிறது. விபத்தை ஏற்படுத்திய இன்னொரு காரின் டிரைவர் கைது செய்யப்பட்டிருக்கிறார். அவரிடம் போலீசார் விசாரணை நடத்தி வருகின்றனர். பாஜக வேட்பாளரின் உடல் நிலை எப்படி உள்ளது என்கிற விவரம் உடனடியாக வெளியாகவில்லை.
விபத்து ஏற்பட்ட செய்தியை அறிந்ததும், சாந்தனு தாகூரின் ஆதரவாளர்கள் கைகட்டா காவல் நிலையம் முன்பு போராட்டத்தில் ஈடுபட்டனர். அவர்களை போலீசார் தடியடி நடத்தி கலைத்தார்கள்.