இந்திய தேர்தல் ஆணையத்தின் பெயரில் செயல்பட்டு வந்த 2 போலி ட்விட்டர் கணக்குகள் முடக்கம் செய்யப்பட்டுள்ளன. இதுதொடர்பாக தேர்தல் ஆணையம் அளித்த புகாரின்பேரில் ட்விட்டர் நிறுவனம் இந்த நடவடிக்கையை எடுத்துள்ளது.
போலியான இந்த 2 கணக்குகளையும் அதிகமானோர் ஃபாலோ செய்துள்ளனர். அவற்றில் ஒரு கணக்கில் 4,751 ஃபோலோயர்கள் இருந்துள்ளனர். இந்த அக்கவுன்ட்டின் முகப்பில் தேர்தல் ஆணையத்தின் லோகோ இடம் பெற்றிருந்தது. @ElectionComm மற்றும் @DalitFederation ஆகியவை முடக்கம் செய்யப்பட்ட போலி அக்கவுன்ட்டுகள்.
தற்போது வரையில் இந்திய தேர்தல் ஆணையத்திற்கென்று ட்விட்டர் அக்கவுன்ட்டுகள் ஏதும் கிடையாது. இதுகுறித்து தேர்தல் ஆணைய அதிகாரிகள் கூறுகையில், ட்விட்டரில் இருந்த 2 அக்கவுன்ட்டுகள் மக்களை தவறாக வழி நடத்தியுள்ளன. இதன் மீது நடவடிக்கை எடுக்க வேண்டும் என தேர்தல் ஆணையத்தின் ஊடக பிரிவு புகார் அளித்தது. இதன்பேரில் நடவடிக்கை எடுக்கப்பட்டுள்ளது என்றனர்.