20 லட்சம் கோடி சிறப்பு தொகுப்பின் இறுதி கட்ட அறிவிப்புகளை இன்று வெளியிடுகிறார் மத்திய நிதியமைச்சர்!

நிர்மலா சீதாராமன்ரூ .20 லட்சம் கோடி நிதி ஊக்கத்தின் ஐந்தாவது தவணையை அறிவிக்கிறார்.

பிரதமர் நரேந்திர மோடி அறிவித்த 20 லட்சம் கோடி சிறப்பு திட்டத்தின் இறுதி கட்ட அறிவிப்பினை மத்திய நிதியமைச்சர் நிர்மலா சீதாராமன் இன்று அறிவிக்கின்றார். முன்னதாக நிலக்கரி, பாதுகாப்பு மற்றும் சிவில் விமானத் துறை, விண்வெளித்துறை போன்றவற்றில் தனியார் நுழைவினை அனுமதிப்பதாக கூறி பல கட்டமைப்பு சீர்திருத்தங்களை அறிவித்திருந்தார். மேலும், விவசாயிகளுக்கு பண்ணை வாயில் உள்கட்டமைப்பிற்காக ரூ .1 லட்சம் கோடி மற்றும் சிறு, குறு நிறுவனங்களை முறைப்படுத்த 10 ஆயிரம் கோடியையும் நிதியமைச்சர் அறிவித்திருந்தார் என்பது குறிப்பிடத்தக்கது.

நிதியமைச்சரின் அறிவிப்பில் குறிப்பிடத்தக்க அம்சங்கள்:

• தற்போது நாம் ஒரு தேசத்து மக்களாக ஒன்றிணைந்து முக்கியமான கட்டத்தில் நிற்கின்றோம். இவ்வளவு பெரிய பேரழிவு இந்தியாவுக்கு ஒரு சமிக்ஞையாகும், இது ஒரு வாய்ப்பினையும் நமக்கு உருவாக்கியுள்ளது.

• நிலம், தொழிலாளர், பணப்புழக்கம் மற்றும் சட்டங்கள் அனைத்தும் சிறப்பு பொருளாதார தொகுப்பில் முன்னதாக வலியுறுத்தப்பட்டுள்ளன. தற்போது ஏற்பட்டுள்ள நெருக்கடி மற்றும் சவால் தன்னம்பிக்கை இந்தியாவை உருவாக்குவதற்கான ஒரு வாய்ப்பாகும்.
• முன்னதாக அறிவிக்கப்பட்ட அறிவிப்புகளின் தொடர்ச்சியாக இன்றைய அறிவிப்பு வெளிவருகிறது. நாடு முழுவதும் முழு முடக்க(LOCKDOWN) நடவடிக்கை மேற்கொள்ளப்பட்டவுடன் பிரதமர் கரிப் கல்யாண் தொகுப்போடு மக்களை அணுகினோம். உணவின்றி தவித்த மக்களுக்கு உணவுகளை வழங்கியுள்ளோம்.
• இந்த நெருக்கடியான சூழலில் மக்களுக்கு மூன்று மாதங்களுக்கு தேவையான பருப்பு வகைகளை நாங்கள் முன்கூட்டியே கொடுத்துள்ளோம். இதில் பங்காற்றிய எஃப்.சி.ஐ, நாஃபெட் மற்றும் மாநிலங்களின் ஒருங்கிணைந்த முயற்சிகளை நான் பாராட்டுகிறேன்.
• மக்கள் கைகளில் நேரடி பணப் பரிவர்த்தனைக்கு பிரதான் மந்திரி கரிப் கல்யாண் தொகுப்பு உதவியது.
• விவசாயிகளுக்கு 2 ஆயிரம் ரூபாய் ஒரு சுற்று வழங்கப்பட்டுள்ளது. இதனால் 8.19 கோடி விவசாயிகள் பயனடைந்துள்ளனர். இதுவரை மொத்தமாக 16,394 கோடி வழங்கப்பட்டுள்ளது. தேசிய சமூக உதவித் திட்டம் மூலமாக முதல் தவணையில் 1,405 கோடியும், இரண்டாவது தவணையில் 1,402 கோடியும் என மொத்தமாக 3 ஆயிரம் கோடி ரூபாய் வழங்க திட்டமிடப்பட்டுள்ளது.
• முழு முடக்க நடவடிக்கையின் போது பல்வேறு மாநிலங்களில் சிக்கித்தவித்த புலம் பெயர் தொழிலாளர்களை அவர்களின் சொந்த மாநிலத்திற்கு கொண்டு செல்ல ஷ்ராமிக் சிறப்பு ரயில்களை மத்திய அரசு இயக்கியது. அதில் பயணிகளுக்கான கட்டணங்களில் 85 சதவிகிதம் மத்திய அரசு ஏற்றுக்கொண்டது.
• சமானிய மக்களின் வாழ்வாதாரத்தினை உறுதி செய்வதற்கும், உயிர்களை காப்பதற்கும்  மத்திய அரசு மேற்குறிப்பிட்ட முயற்சிகளை செய்து வருகிறது.
• இன்று ஏழு கட்ட அறிவிப்புகள் வெளியிடப்பட உள்ளன. இதில், மகாத்மா காந்தி ஊரக வேலை வாய்ப்பு திட்டம், கிராமப்புற மற்றும் நகர்ப்புற கல்வி, மற்றும் சுகாதாரம் குறித்து, வணிகங்கள் குறித்து, நிறுவனங்களின் சட்ட மயமாக்கல் சட்டம், வணிகத்தை எளிதாக்குதல், பொதுத்துறை நிறுவனங்கள், மாநில அரசு மற்றும் அது தொடர்புள்ள வளங்கள் போன்றவை குறித்து இன்று அறிவிக்கப்படும்.
• மகாத்மா காந்தி ஊரக வேலை வாய்ப்பு திட்டம் மூலமாக புலம் பெயர் தொழிலாளர்கள் தங்கள் மாநிலங்களிலேயே வேலையை பெறுவதற்கு வழிவகை செய்யப்பட்டுள்ளது. இந்த திட்டத்திற்காக கூடுதலாக 40 ஆயிரம் கோடி ரூபாய் ஒதுக்கீடு செய்யப்பட்டுள்ளது. ஏற்கெனவே ஊரக வேலை வாய்ப்பு திட்டத்திற்காக 61,000 கோடி ரூபாய் ஒதுக்கப்பட்ட நிலையில் இப்போது கூடுதலாக 40,000 கோடி ஒதுக்கப்பட்டுள்ளது.

கிராமப்புற மற்றும் நகர்ப்புற கல்வி மற்றும் சுகாதாரத்தினை பொறுத்த அளவில்,

• இந்த நெருக்கடிக்கு இடையில் கிடைத்துள்ள வாய்ப்பினை பார்க்க வேண்டும். தற்போது சுகாதார சீர்திருத்தங்கள் மற்றும் முன்முயற்சிகள் முன்னெடுக்கப்பட்டுள்ளன. கிராம புறங்களில் போதிய அளவில் தொற்றுக்கான ஆய்வுகள் இல்லை.

• கல்வியை பொறுத்த அளவில் ஒவ்வொரு வகுப்புகளுக்கும் ஒரு ஒளி அலைவரிசை(சேனல்) என மொத்தம் 12 அலைவரிசைகள் தொடங்கப்பட உள்ளன. இது நகர்ப்புற மற்றும் கிராமப்புறங்களில் உள்ள குழந்தைகளுக்கு பெரிதும் உதவும். கல்வியைத் தொடரவும் கற்றலை மேம்படுத்தவும் தொழில்நுட்பம் பெரிய அளவில் பயன்படுத்தப்பட்டுள்ளது. மாணவர்களுக்குக் கல்வி தொடர்பாக உதவ சுயம் பிரபா டி.டி.எச் சேனல் தொடங்கப்பட்டு இருக்கிறது. இணைய வசதி இல்லாத மாணவர்களுக்கு இது உதவும் என்றார் நிர்மலா சீதாராமன்.

• அனைத்து மாவட்டங்களில் தொற்றுநோய் தடுப்பு மையம். பொது சுகாதார ஆய்வு மையங்களை அனைத்து வட்ட அளவிலும் அமைக்கப்படும்.

திவால் நிலை மற்றும் திவால் குறியீடு தொடர்பாக

• கொரோனா நெருக்கடியால் ஏற்பட்ட கடன்கள் வாராக்கடன்களாக வரையறுக்கப்படாது.

• திவாலுக்கான வரம்புகள் 1 லட்சத்திலிருந்து 1 கோடியாக உயர்த்தப்பட்டுள்ளன. இதற்கான சட்டம் வரும் நாடாளுமன்ற கூட்டத்தில் நிறைவேற்றப்படும்.

• நிறுவனங்கள் திவாலாகும் நிலை ஏற்பட்டால் நடவடிக்கை எடுக்கும் காலம் 6 மாதத்திலிருந்து ஓராண்டாக அதிகரிக்கப்பட்டுள்ளது. 

நிறுவனங்களுக்கான சட்டங்களை பொறுத்த அளவில்

• சிறு நிறுவனங்கள், ஒரு நபர் நடத்தும் நிறுவனங்கள், ஸ்டார்ட் அப் நிறுவனங்களுக்கு கடன் தொடர்பான அபராதங்கள் குறைக்கப்படுகிறது.
• நிறுவனங்களின் 7 விதிமீறல்கள் தொடர்பான நடவடிக்கைகள் கைவிடப்படுகின்றன.
• சொத்துகள் பதிவு எளிமையாக்கப்படும். வர்த்தக சர்ச்சைகளுக்கு விரைந்து தீர்வு காண நடவடிக்கை எடுக்கப்படும்.

பொதுத்துறையை பொறுத்த அளவில்,

• அனைத்து துறைகளிலும்  தனியாரின் பங்களிப்பு ஊக்குவிக்கப்படும்.
• தனியார் அனைத்து துறைகளிலும் செயல்பட அனுமதிக்கப்பட்டாலும் பொதுத்துறை தொடர்ந்து இயங்கும்.
• பொது முக்கியத்துவம் வாய்ந்த துறைகள் எவை என்பது குறித்தும், தனியார் முதலீட்டுக்கு அனுமதிக்கப்படாத பொதுத்துறை நிறுவனங்கள் எவை என்பது குறித்தும் அரசாணை வெளியிடப்படும்

மாநிலங்களுக்கான நிதியை பொறுத்த அளவில்,

• மாநிலங்கள் தொடர்ந்து நிதி சரிவை எதிர்கொண்டுள்ளன. தொற்று நோயை மாநிலங்கள் எதிர்கொள்வதற்கான அனைத்து உதவிகளையும் மத்திய அரசு செய்யும்.
• வருவாய் பற்றாக்குறை மானியமாக மாநிலங்களுக்கு ஏப்ரல், மே மாதங்களில் ரூ.12,390 கோடி வழங்கப்பட்டுள்ளது.
• மாநிலங்களுக்கு பட்ஜெட்டின் அடிப்படையில் ரூ .46,038 கோடி ஒதுக்கீடு செய்யப்பட்டது.
• பேரிடர் மீட்பு நிதியாக முதல் வாரத்தில் ரூ .11,092 கோடி வழங்கப்பட்டுள்ளது.
• கொரோனா தொற்றினை எதிர்கொள்ள ரூ .4,113 கோடி வழங்கப்பட்டுள்ளது.
• மாநிலங்களுக்கான கடன் வரம்பினை 3% லிருந்து 5% ஆக உயர்த்தப்பட்டுள்ளது. இதன் மூலமாக மாநிலங்களுக்கு கூடுதலாக ரூ .4.28 லட்சம் கோடி வரை நிதி கிடைக்கும்.