தீவிர ஊரடங்கு அமல்படுத்தப்பட்ட பகுதிகளில் உள்ள அம்மா உணவகங்களில் விலையில்லா உணவு!

தமிழகத்தில் கொரோனா தடுப்பு முன்னெச்சரிக்கை நடவடிக்கையாக இன்று நள்ளிரவு முதல் தீவிர ஊரடங்கு அமல்படுத்தப்பட உள்ளது. இந்நிலையில் தீவிர ஊரடங்கு அமல்படுத்தப்பட இருக்கும் பகுதிகளில் உள்ள அம்மா உணவகங்களில் இலவச உணவு வழங்கப்படும் என தமிழக அரசு தெரிவித்துள்ளது. இது குறித்து முதல் வெளியிட்டுள்ள அறிக்கையில்…

“தமிழகத்தில் ஊரடங்கு உத்தரவு பிறப்பிக்கப்பட்ட பின்பு, ஏழை எளிய மக்களின் நலன் கருதி அம்மா உணவகங்களில் வழங்கப்படும் உணவு விலையில்லாமல் 31.05.2020 வரை வழங்கப்பட்டு வந்தது. தற்போது சென்னை பெருநகர காவல்துறை எல்லைக்குட்பட்ட பகுதிகளிலும், மற்றும் சென்னையை சுற்றியுள்ள மாவட்டங்களில் உள்ள சில பகுதிகளிலும் தீவிர ஊரடங்கு இன்று நள்ளிரவு முதல் அமல்படுத்தப்பட்ட உள்ள நிலையில், இப்பகுதிகளில் செயல்படும் அனைத்து அம்மா உணவகங்களிலும் விலையில்லாமல் உணவு வழங்க முதல்வர் எடப்பாடி பழனிசாமி உத்தரவிட்டுள்ளார். “

“மேலும், முதியோர், நோயுற்றோர் மற்றும் ஆதரவற்றோர்களின் நலன் கருதி தற்போது இயங்கி வரும் சமுதாய உணவுக் கூடங்கள் மூலம் உணவு தயாரிக்கப்பட்டு அவர்களின் இல்லங்களுக்குச் சென்று விலையில்லாமல் வழங்கப்பட்டு வருகிறது. ஊரடங்கு தீவிரப்படுத்தப்பட்டுள்ள இந்நிலையில், இப்பகுதிகளில் உள்ள சமுதாய சமையல் கூடங்களை மேலும் வலுப்படுத்தி, போதுமான அளவு உணவு சமையல் செய்து, இந்த உணவை, விலையில்லாமல், தேவைப்படும் முதியோர் நோயுற்றோர் மற்றும் ஆதரவற்றோர்களின் இல்லங்களுக்கே சென்று வழங்கவும் ஆணையிடப்பட்டுள்ளது. இந்த நடைமுறை நாளை 19.06.2020 முதல் 30.06.2020 வரை செயல்பாட்டில் இருக்கும்“ என முதல்வர் தனது அறிக்கையில் தெரிவித்துள்ளார்.