2018 ஏப்ரல் வரை 6 லட்சத்திற்கும் அதிகமான இந்தியர்கள் க்ரீன் கார்டுக்காக காத்துள்ளனர்.
அமெரிக்காவில் ஆண்டு தோறும் லட்சக்கணக்கான வெளிநாட்டவர்கள் பணிக்காக செல்கின்றனர். அவர்கள் தற்காலிகமாக தங்குவதற்கு மட்டுமே அனுமதி அளிக்கப்படுகிறது. சட்டப்பூர்வமாக நிரந்தரமாக அங்கு தங்க வேண்டும் என்றால் க்ரீன் கார்டு பெற வேண்டும். இதனைப் பெறுவதற்கு 6 லட்சத்திற்கும் அதிகமான இந்தியர்கள் விண்ணப்பித்துள்ளனர்.
ஏப்ரல் மாதம் வரையிலான தகவலின்படி பணிபுரிவோர் அவர்களது மனைவி அல்லது கணவன், குடும்பத்தினர், குழந்தைகள் உள்பட மொத்தம் 632,219 இந்தியர்கள் க்ரீன் கார்டுக்காக விண்ணப்பித்துள்ளார்கள்.
அதே நேரத்தில் கடந்த 2017-ம் ஆண்டில் மட்டும் 60,394 இந்தியர்களுக்கு க்ரீன் கார்டு கிடைத்துள்ளது. இவற்றில் எச்.-1பி விசா அடிப்படையில் முன்னுரிமை அளிக்கப்பட்டு அதிகபட்சமாக 23,569 பேர் க்ரீன் கார்டு பெற்றுள்ளனர்.
க்ரீன் கார்டு வைத்திருப்பதன் மூலம் ஒருவர் அமெரிக்காவில் நிரந்தரமாக தொழில் செய்யவோ, பணி புரியவோ முடியும். திறமை மிக்க இந்தியர்கள் எச்.-1 பி விசா அடிப்படையில் பணிக்கு அமர்த்தப்படுகிறனர். இவர்கள், சமீபத்தில் மாற்றி அமைக்கப்பட்ட விதிகளின்படி கடுமையாக பாதிக்கப்பட்டு வருகின்றனர். இந்த விதிகளின்படி எச்-1பி விசா வைத்திருப்பவர்களில் 7 சதவீதம் பேருக்கு மட்டுமே க்ரீன் கார்டு அளிக்கப்படுகிறது.
மேலும் ஒரு அதிர்ச்சி அளிக்கும் தகவலாக, அமெரிக்காவில் க்ரீன் கார்டு பெறும் இந்தியர்களின் எண்ணிக்கை கணிசமாக குறைக்கப்பட்டு வருவதாக கூறப்படுகிறது. முந்தைய ஆண்டுகளை விட கடந்த 2 ஆண்டுகளில் க்ரீன் கார்டு பெற்ற இந்தியர்களின் எண்ணிக்கை குறைவு என்பது குறிப்பிடத்தக்கது.