மும்பையில் கடந்த சில நாட்களாக கன மழை பெய்து வருகிறது. இந்நிலையில், இன்னும் சில நாட்களுக்கு மழை தொடரும் என்று கூறப்பட்டுள்ளது. இதனால், அனைத்துத் அரசுத் துறைகளும் உஷார் நிலையில் வைக்கப்பட்டு உள்ளது.
குறிப்பாக நேற்று முழுவதும் பெய்த தொடர் மழையால் மும்பையின் முக்கிய சாலைகள் வெள்ளக் காடாக மாறியுள்ளன. மக்களின் இயல்பு வாழ்க்கை பெரிதும் பாதிக்கப்பட்டு உள்ளது. இந்த மழையால், பல ரயில்கள் ரத்து செய்யப்பட்டு உள்ளன. மேலும், சில விமானங்களும் இன்று செல்லாது என்று தெரிவிக்கப்பட்டு உள்ளது. இந்நிலையில், வரும் திங்கட்கிழமை வரை மழை தொடரும் என்று தெரிவிக்கப்பட்டு உள்ளது.
மும்பையில் மழை எப்படி இருக்கும் என்பது குறித்து வானிலை ஆய்வு மையம், `நகரத்தில் குறைந்தபட்சம் அடுத்த இரண்டு நாட்களுக்கு மழையின் வீச்சு அதிகரிக்கும். இதனால், மீனவர்கள் கடலுக்கு மீன் பிடிக்கச் செல்ல வேண்டாம். முடிந்த வரை மக்கள் அவர்கள் இருப்பிடத்தில் இருந்து வெளியே வருவதை தவிர்க்க வேண்டும்' என்று தெரிவித்துள்ளது.