ஜம்மு காஷ்மீரில் சிறப்பு அந்தஸ்து நீக்கப்பட்டது தொடர்பாக முன்னாள் முதல்வர் பரூக் அப்துல்லா, பொது அமைதி பாதுகாப்பு சட்டத்தின் கீழ் கைது செய்யப்பட்டு வீட்டுச் சிறையில் அடைக்கப்பட்டுள்ளார். அவர் மேலும் 3 மாதங்களுக்கு வீட்டுச் சிறையில் இருப்பார் என்று மத்திய அரசு அறிவித்துள்ளது. ஜம்மு காஷ்மீர் மாநிலமாக இருந்தபோது, அங்கு 3 முறை முதல்வராக பொறுப்பில் இருந்தவர் பரூக் அப்துல்லா.
ஜம்மு காஷ்மீரில் கடந்த ஆகஸ்ட் 5-ம்தேதி மத்திய அரசு சிறப்பு அந்தஸ்தை ரத்து செய்தது. இதன்பின்னர் மாநிலம் காஷ்மீர் மற்றும் லடாக் என 2 யூனியன் பிரதேசங்களாக பிரிக்கப்பட்டன.
இந்த சூழலில் பொது அமைதி பாதுகாப்பு சட்டத்தின் காஷ்மீரின் முன்னாள் முதல்வர்கள், அரசியல் தலைவர்கள் உள்ளிட்டோர் கைது செய்யப்பட்டு வீட்டுச் சிறையில் வைக்கப்பட்டார்கள்.
இந்த சட்டத்தின் அடிப்படையில் ஒருவரை 2 ஆண்டுகள் எந்த வித விசாரணையும் இன்றி சிறையில் வைக்க முடியும். இந்த நிலையில், பரூக் அப்துல்லாவின் வீட்டுக் காவல் மேலும் 3 மாதங்களுக்கு நீட்டிக்கப்பட்டுள்ளது.
பொதுவாக பெரும் குற்றவாளிகளுக்கு பயன்படுத்தப்பட்டு வரும் இந்த சட்டம் முதன்முறையாக அரசியல் கட்சி தலைவரும், நாடாளுமன்ற உறுப்பினரும், காஷ்மீரில் 3 முறை முதல்வராக இருந்தவருமான பரூக் அப்துல்லா மீது பாய்ந்துள்ளது.
முன்பு மரக்கட்டைகளை கடத்துபவர்களுக்கு எதிராக பரூக் அப்துல்லாவின் தந்தை ஷேக் அப்துல்லா பொது அமைதி பாதுகாப்பு சட்டத்தை கடந்த 1978-ல் கொண்டு வந்தார் என்பது குறிப்பிடத்தக்கது.