இந்த அறிவிப்பு அரசு மற்றும் அரசு உதவி பெறும் பள்ளிகளுக்கானது என பள்ளிக்கல்வித்துறை சார்பில் தெரிவிக்கப்பட்டுள்ளது.
தமிழகத்தில் பள்ளிகளுக்கு மேலும் ஒரு நாள் விடுமுறை விடப்படுவதாக பள்ளிக் கல்வித்துறை அறிவித்துள்ளது.
தமிழகத்தில் 10,11,12 உள்ளிட்ட வகுப்புகளுக்கு அரையாண்டு தேர்வுகள் கடந்த 11-ம்தேதி தொடங்கி 23-ம்தேதி வரையில் நடைபெற்றன. இதையடுத்து, அரையாண்டு தேர்வு விடுமுறை அறிவிக்கப்பட்டிருந்தது.
இதற்கிடையே மீண்டும் பள்ளி எப்போது திறக்கும் என்ற எதிர்பார்ப்பு மாணவர்கள் மத்தியிலும், பெற்றோர் மத்தியிலும் காணப்பட்டது. இந்த நிலையில் அரையாண்டு விடுமுறைக்கு பின்னர் தமிழகத்தில் ஜனவரி 2-ம்தேதி பள்ளிகள் திறக்க திட்டமிடப்பட்டிருந்தது.
இதனிடையே, தமிகத்தில் உள்ளாட்சி தேர்தல் வாக்குப்பதிவு முடிவுகள் ஜனவரி 2-ம்தேதி வெளியாவதாக அறிவிக்கப்பட்டது. இதைத்தொடர்ந்து, 3-ம்தேதி பள்ளிகள் திறக்கப்படும் என்று பள்ளிக் கல்வித்துறை தெரிவித்தது.
தமிழகத்தில் உள்ளாட்சி தேர்தல் வாக்குப்பதிவானது, டிசம்பர் 27 மற்றும் 30 ஆகிய தேதிகளில் நடைபெற்று முடிந்துள்ளது. வாக்குகள் 2020 ஜனவரி 2-ம்தேதி எண்ணப்பட்டு அன்றைய தினம் முடிவுகள் அறிவிக்கப்படுகின்றன. தமிழகத்தில் புதிதாக பிரிக்கப்பட்ட மாவட்டங்களை தவிர்த்து மற்ற 27 மாவட்டங்களில் ஊரக உள்ளாட்சி தேர்தல் நடைபெற்று முடிந்துள்ளது.
இந்நிலையில் 3-ஆம் தேதியும் வாக்கு எண்ணிக்கை தொடரலாம் என தேர்தல் அதிகாரிகள் வட்டாரத்தில் ஆலோசிக்கப்பட்டுள்ளது. இதனால் பள்ளிகள் திறப்பை 4-ஆம் தேதிக்கு பள்ளிக் கல்வித்துறை மாற்றியிருக்கிறது.
இந்த அறிவிப்பு அரசு மற்றும் அரசு உதவி பெறும் பள்ளிகளுக்கானது என பள்ளிக்கல்வித்துறை சார்பில் தெரிவிக்கப்பட்டுள்ளது.