அமெரிக்க அரசின், பாதுகாப்புத் துறையான பென்டகன் சில ‘அடையாளம் தெரியாத பறக்கும்' பொருட்கள் குறித்தான 3 வீடியோக்களை அதிகாரப்பூர்வமாக வெளியிட்டுள்ளது. இது குறித்து அமெரிக்க பாதுகாப்புத் துறை, “தற்போது வெளியிடப்பட்ட வீடியோக்கள் 2004 மற்றும் 2005 ஆம் ஆண்டு பதிவு செய்யப்பட்டவை. இந்த வீடியோக்களில் வரும் பொருட்கள் அடையாளம் தெரியாதவை என்னும் வரம்பிற்குள் வரும்,” என்று அறிக்கை மூலம் குறிப்பிட்டுள்ளது.
முன்னதாக இந்த வீடியோக்கள் 2007 மற்றும் 2017 ஆம் ஆண்டு லீக் செய்யப்பட்டது.
பென்டகன் ரிலீஸ் செய்துள்ள வீடியோக்களில், ஒரு விண்வெளித் தட்டு போன்று உள்ள பொருள், அங்கும் இங்கும் அலைபாய்வது தெரிகிறது. இந்த வீடியோக்கள் இன்ஃப்ரா ரெட் கேமராக்கள் மூலம் பதிவு செய்யப்பட்டவை என்று சிஎன்என் செய்தி நிறுவனம் தகவல் தெரிவிக்கிறது. இதைப் போன்ற பொருட்களை UFO என்று சொல்வதுண்டு. இவை வேற்று கிரகவாசிகள் என்று சொல்லப்படும் ஏலியன்ஸ்களால் பயன்படுத்தப்படலாம் என்று இணையதளங்களில் விவாதிப்பவர்கள் சொல்கிறார்கள்.
இந்த காரணத்தினால் பென்டகன், வீடியோ ரிலீஸ் செய்ததில் இருந்து #UFOs என்னும் ஹாஷ்-டேக் டிரெண்டாகி வருகிறது. பலரும் ரிலீஸ் செய்யப்பட்ட வீடியோக்களை தங்கள் சமூக வலைதள பக்கங்களில் பகிர்ந்து வருகிறார்கள்.
இந்த வீடியோக்கள் மூலம் ஏலியன்ஸ் பூமிக்கு வந்து செல்வது உறுதியாகி இருப்பதாக சிலர் ஆருடம் சொல்கிறார்கள்.
2020 ஆம் ஆண்டில் ஏற்கெனவே பல எதிர்பார்க்காத சம்பவங்கள் நடந்துள்ள நிலையில், இந்த வீடியோ வெளியீடு அந்தப் பட்டியலில் அடுத்தபடியாக தெரிவதாகவும் சிலர் கருத்திட்டுள்ளனர்.
அதே நேரத்தில் இந்த காணொலிக் காட்சிகள் வெளியிட்டது குறித்து அமெரிக்க பாதுகாப்புத் துறை, “பொது மக்கள் எந்தவித தவறான தகவல்களையும் நம்பிவிடக் கூடாது என்னும் அடிப்படையில்தான் இந்த வீடியோக்கள் வெளியிடப்பட்டன,” என்று விளக்கம் கொடுக்கப்பட்டுள்ளது.