தங்க கட்டிகளை பிளாஸ்டிக் பைகளில் மடக்கி, இடுப்பில் சுற்றி கடத்த முயற்சி!
டெல்லி விமான நிலையத்தில் அரபுநாட்டை சேர்ந்த நபர் ஒருவர், சுமார் 53 லட்சம் மதிப்புள்ள தங்கத்தை இந்தியாவுக்குள் சட்ட விரோதமாக கடத்த முயன்றதாக போலீசாரால் பிடிபட்டார்.
கடந்த ஞாயிறு அன்று சவுதி அரேபியாவில் உள்ள தாமாம் என்னும் இடத்தில் இருந்து வந்த அந்த நபரை போலீசார் சோதனை செய்ததில், சுமார் 1.6 கிலோ எடையுள்ள 15 தங்க கட்டிகள் அவரிடம் இருந்தது தெரியவந்தது. இதையடுத்து, சுங்கத்துறை அதிகாரிகள் தங்க கட்டிகளை பறிமுதல் செய்தனர்.
இதுகுறித்து காவல்துறையினர் கூறும்போது, ‘நெகிழி பைகளால் தங்க கட்டிகளை தனது இடுப்பை சுற்றி அந்நபர் கட்டி இருந்ததாக' தகவல் அளித்தனர். மேலும், பிடிபட்ட தங்கத்தின் மதிப்பு சுமார் 53.7 லட்சமாக இருக்கும் என்று தெரிவித்துள்ளனர். இதைத்தொடர்ந்து தங்கத்தை கடத்த முயன்ற சவுதியை சேர்ந்த நபர் கைது செய்யப்பட்டதாக தகவல்கள் தெரிவிக்கின்றன.