‘வெளிப்படையாகப் பேசினால் இந்த நிலைமை தானா?’ - நடிகை தனுஸ்ரீ தத்தா ஆதங்கம்

நடிகை தனுஸ்ரீ தத்தாவுக்கு எதிராக நடிகர் நானா படேகர் மற்றும் தயாரிப்பாளர் விவேக் அக்னிஹோத்ரி ஆகிய இருவரும் சட்டப்பூர்வமாக நோட்டீஸ் அனுப்பியுள்ளனர்.

சில ஆண்டுகளுக்கு முன்னர் படப்பிடிப்புத் தளத்தில் நடிகர் நானா படேகர், தனக்குப் பாலியல் துன்புறுத்தல் அளித்து மிரட்டியதாக குற்றம் சுமத்தியிருந்நார் தனுஸ்ரீ. தற்போது நடிகர் அக்‌ஷய் குமார் உடன் இணைந்து, நானா படேகர் ‘ஹவுஸ்ஃபுல் 4’ என்ற திரைப்படத்தில் நடித்து வருகிறார். இந்நிலையில் கடந்த வாரம் தனுஸ்ரீ தத்தாவுக்கு சட்டப்பூர்வமான நோட்டீஸ் அனுப்பிய நானா படேகார், தன் மேல் சுமத்தப்பட்டுள்ள குற்றச்சாட்டை மறுத்து தனுஸ்ரீ இதற்காக தன்னிடம் மன்னிப்புக் கேட்க வேண்டும் என்று கோரியுள்ளார்.

கடந்த வாரம் தான் தயாரிப்பாளர், இயக்குநர் விவேக் அக்னிஹோத்ரி 2005-ம் ஆண்டு ‘சாக்லேட்’ திரைப்பட படப்பிடிப்பின் போது தன்னை ஆடைகளைக் களைந்து நடனம் ஆடச் சொன்னதாக தனுஸ்ரீ குற்றம் சுமத்தினார். மேலும், தற்போது சட்டப்படியான நோட்டீஸ் அனுப்பியுள்ள நானா படேகரும் விவேக் அக்னிஹோத்ரியும் தனக்கு எதிராக பொய்யான தகவல்களை சமூக வலைதளங்களிலும் பொது வெளியிலும் பரப்புவதாக தனுஸ்ரீ குற்றஞ்சாட்டியுள்ளார்.

மேலும் தனுஸ்ரீ தத்தா, ‘பாலியல் துன்புறுத்தல், அவமானம் மற்றும் அநீதிக்கு எதிராக ஒருவர் வெளிப்படையாகப் பேசினால் இதுதான் உங்களுக்கு நடக்கும்’ எனக் கூறியுள்ளார்.

மகாராஷ்டிரா நவநிர்மான் சேனா அமைப்பிடமிருந்து தனக்கு மிரட்டல்கள் வருகிறது என்றும் முகம் தெரியாத நபர்கள் வீட்டுக்குள் புகுந்துவிட்டதாகவும் தனுஸ்ரீ புகார் தெரிவித்துள்ளார். இதேபோல் தான் கடந்த 2008-ம் ஆண்டு ‘ஹார்ன் ஓகே ப்ளீஸ்’ என்ற திரைப்படத்தில் இருந்து தனுஸ்ரீ விலகிய போது ராஜ் தாக்கரேவின் இதே நவநிர்மான் சேனா அமைப்பு அவரது காரை தாக்கியுள்ளனர்.

“தொடர்ந்து எனக்கு எதிராக வன்முறை மிரட்டல்கள் மகாராஷ்டிரா நவநிர்மான் சேனா அமைப்பில் இருந்து வந்து கொண்டே இருக்கிறது. நான் வீட்டில் இருந்தபோது, பாதுகாப்பு அதிகாரிகள் அசந்த நேரத்தின் போது முகம் தெரியாத இருவர் என் வீட்டினுள் நுழைந்துவிட்டனர். ஆனால், தகுந்த நேரத்தில் போலீஸ் அதிகாரிகள் தடுத்துவிட்டனர்’’ என்று தனுஸ்ரீ கூறியுள்ளார்.

இந்த சமயம், நடிகர் சல்மான் கான் தொகுத்து வழங்கும் பிக்பாஸ் 12 நிகழ்சியில் நடிகை தனுஸ்ரீ தத்தா பங்கேற்கக் கூடாது என மிரட்டல் வந்துள்ளதாகக் கூறப்படுகிறது. இப்பிரச்னை குறித்து சல்மான் கானிடம் கேட்ட போது, ‘இப்பிரச்னை குறித்து இதுவரை எனக்கு ஏதும் தெரியாது. என்ன நடக்கிறது என்பதை முதலில் நான் தெரிந்து, புரிந்து கொள்கிறேன்’ எனக் கூறியுள்ளார்.