தமிழக மீன்வளத்துறை அமைச்சர் ஜெயக்குமார் ஒரு பெண்ணிடம் உரையாடுவது போன்ற ஆடியோ ஒன்று சமூக வலைதளங்களில் வெளியாகி வைரலாகி வருகிறது. இது குறித்து தமிழக எதிர்கட்சியினர் கேள்வி எழுப்பியுள்ளனர். இதையடுத்து, டிடிவி தினகரன் ஆதரவாளரான தகுதி நீக்கம் செய்யப்பட்டுள்ள எம்.எல்.ஏ தங்க தமிழ்ச்செல்வன், ‘மீன்வளத் துறை அமைச்சராக இருந்த ஜெயக்குமார் கருவாட்டுத் துறை அமைச்சராக மாறியுள்ளார்' என்று கிண்டலடித்துள்ளார்.
இது குறித்து அவர் மேலும் பேசுகையில், ‘சசிகலா சொன்னதன் பெயரில் தான் ஜெயக்குமார் மீன்வளத் துறை அமைச்சராக நியமிக்கப்பட்டார். ஆனால், இன்று அவர் கருவாட்டுத் துறை அமைச்சராக மாறி நிற்கிறார்.
ஆடியோ பதிவு குறித்து பேசும் ஜெயக்குமார், அதிலிருப்பது தன்னுடைய குரல் இல்லை என்று கூறி வருகிறார். ஆனால், பெண்ணின் வயிற்றில் இருப்பது தன்னுடைய குழந்தை இல்லை என்று ஏன் சொல்ல மறுக்கிறார்?
மக்கள் அனைத்துப் பிரச்னைகளையும் பார்த்து வருகின்றனர். தொழில்நுட்பம் அதிகம் வளர்ந்துள்ள இந்த நேரத்தில், யாரும் எதிலிருந்தும் தப்பிக்க முடியாது. ஜெயக்குமார் விஷயத்தில் சீக்கிரமே உண்மை வெளியில் வரும்' என்று கூறினார்.