இரண்டு பாம்புகள் தாறுமாறாக டான்ஸ் ஆடும் வீடியோ, ட்விட்டர் தளத்தில் பகிரப்பட்டு பலரை ஆச்சரியத்தில் ஆழ்த்தியுள்ளது. பெங்களூருவைச் சேர்ந்த வசுதா வர்மா என்பவரால் இந்த வீடியோ பகிரப்பட்டுள்ளது. அவர், இந்த வீடியோ, கோல்ஃப் கோர்ஸ் ஒன்றில் எடுக்கப்பட்டதாகத் தெரிவித்துள்ளார். 36 நொடிகள் ஓடும் அந்த வீடியோவில், இரண்டு ரேட் வகைப் பாம்புகள், கட்டிப் புரண்டு டான்ஸ் ஆடுவது போலத் தெரிகிறது.
இது குறித்து வீடியோவுடன் வர்மா, “கோல்ஃப் கோர்ஸில் புதர் மண்டியுள்ள ஓர் இடம் இரு பாம்புகளுக்கு நடனமாடும் இடமாக மாறியுள்ளது. வளைந்து நெளிந்து பாம்புகள் ஆடுகின்றன. இயற்கையில்தான் எத்தனை அழகு,” என்று நெகிழ்ச்சியோடு எழுதியுள்ளார். இந்த வீடியோவுடன் பல இந்திய வனத் துறை அதிகாரிகளையும் வர்மா, டேக் செய்துள்ளார்.
பகிரப்பட்டதிலிருந்து இந்த வீடியோ, 6,000 முறை பார்க்கப்பட்டுள்ளது. பலரும் ஆச்சரியத்தில், வீடியோவுக்குக் கீழே கருத்திட்டு வருகிறார்கள். வீடியோவில் டான்ஸ் ஆடும் பாம்புகள், நாகப் பாம்பு என்று சிலர் சொன்னார்கள். அதை மறுத்த இந்திய வனத் துறை அதிகாரியான சுசாந்தா நந்தா, வீடியோவில் தெரிவது ரேட் வகைப் பாம்புகள்தான் என்றும் நாகப் பாம்பு இல்லையென்றும் உறுதிப்படுத்தியுள்ளார்.
இரு பாம்புகள் இப்படி டான்ஸ் ஆடுவது என்பது ‘மேட்டிங்' எனப்படும் உறவு வைத்துக் கொள்வது என்று சில ட்விட்டர் பயனர்கள் கருத்து தெரிவித்துள்ளனர். இது குறித்துத் தெளிவுபடுத்திய Smithsonian மேகஸீன், இரு பாம்புகள் இப்படி வளைந்து நெளிந்து காணப்படுவது, உறவு வைத்துக் கொள்வதாக மட்டும் எடுத்துக் கொள்ளப்படாது. இரு ஆண் ரேட் பாம்புகள் கூட இப்படிப்பட்ட காரியத்தில் ஈடுபடும். தங்களில் யார் பெரியவர் என்பதைக் காட்டிக் கொள்ளக் கூட இப்படிப்பட்ட ‘டான்ஸில்' பாம்புகள் ஈடுபடலாம் எனப்படுகிறது.